Bu gün Bolqarıstanın paytaxtında 6 tanınmış qrossmeysterin iştirakı ilə 3-cü M-Tel Masters super turniri start götürəcək.
Ayın 18-dək Sofiya qaydaları ilə dairəvi yarışda Teymur Rəcəbov da iştirak edəcək.
Hazırda dünyanın şahmatçısı olan Teymur Rəcəbov 3-cü Sofiya turnirinə ilk dəfədir ki, dəvət alır. Həmyerlimizin Super turnirdəki rəqibləri bolqarıstanlı Veselin Topalovla İvan Çeparinov, çinli Bu Xiandci, ermənistanlı Levon Aronyan və ukraynalı Vasili İvançuk olacaq. Bu şahmatçılardan ikisi ilə bir neçə gün əvvəl Bakıda Qran-Pri turnirinin ilk mərhələsində oynayan Rəcəbov, indiyədək Çeparinovla 3 görüşdən 2-də qalib gəlib, birində uduzub. İvançukla 10 oyundan yalnız 2-ni öz xeyrinə qurtaran qrossmeysterimiz 1 görüşü heç-heçə 7-ni isə məğlubiyyətlə başa vurub. Xiandci ilə yeganə görüşdə məğlub olan şahmatçımız, Aronyanla 7 oyundan 2-ni heç-heçə qalanlarını xalsız başa vurub. Super turnirin reytinq favoriti Topalovla 2 görüşdə uduzan Rəcəbovun yarışı ən pis halda ilk üçlükdə başa vurması, müsbət nəticə kimi qiymətləndiriləcək. 21 yaşlı Rəcəbov yarışın reytinq sıralamasında yalnız çinli rəqibini qabaqlayır. Birinci dövrədən sonra, ayın 13-də istirahət günündən istifadə edən şahmatçılar, Sofiyanın Levski komandası ilə futbol görüşü keçirəcəklər. Azərbaycan şahmat federasiyasının vitse-prezidenti Faiq Həsənov yarışın ispaniyalı baş hakiminin köməkçisi olacaq. 2 dövrədən ibarət Sofiya super turniri ayın 18-də yekunlaşacaq. Qeyd edək ki, ötən il bu yarışda iştirak edən Şəhriyar Məmmədyarov 3-cü 5-ci pillələri bölüşüb.