Türkiyənin UEFA kubokundakı yeganə təmsilçisi 1/8 finala yüksəldi

Türkiyənin UEFA kubokundakı yeganə təmsilçisi olan “Qalatasaray” klubu öz meydanında Fransanın “Bordo” klubunu məğlub edib. Lent.az-ın məlumatına görə, bununla da “Qalatasaray” növbəti mərhələyə yüksəlib.

Hesab oyunun 15-ci saniyəsində açılıb. “Qalatasaray”ın müdafiəçilərinin kobud səhvindən sonra “Bordo”nun oyunçusu Belon hesabı açıb. Bundan sonra İstanbul klubu təşəbbüsü ələ alaraq bir neçə dəfə təhlükəli vəziyyət yaradıb. Amma hesabı ancaq 43-cü dəqiqədə bərabərləşdirmək mümkün olub. Ardanın cərimə meydançası kənarından vurduğu zərbə ilə hesab bərabərləşib. Üstündən cəmi 2 dəqiqə keçəndən sonra bu dəfə Küell təxminən 35 metr məsafədən topu “Bordo”nun qapısının “doqquzluğuna” yönəldib. Bu qolun Avropa kuboklarında vurulan ən yaxşı qollar siyahısına düşəcəyi şübhə doğurmur.

İkinci hissəyə arxayın çıxan “Qalatasaray” 65-ci dəqiqədə hesabı 3:1-ə çatdırıb. Linkoln və Ardanın gözəl kombinasiyası sonuncunun hesab arasındakı fərqi ikiyə çatdırmasına gətirib çıxarıb.

Amma bu qoldan sonra arxayınçılıq “Qalatasaray”ı həddən artıq çətin vəziyyətə salıb. Şamax və Kavenaqi 74 və 75-ci dəqiqlərdə iki qola imza ataraq Türkiyə klubunun növbəti mərhələyə çıxmaq şanslarını heçə endiriblər.

Bundan sonra bütün heyətlə irəli atılan “Qalatasaray” sonuncu dəqiqədə özünə lazım olan hesabı əldə edib. Linkolnun künc zərbəsindən sonra fransız klubunun müdafiəçisi topu cərimə meydanından uzaqlaşdırıb. Amma topa birinci yetişənn Səbri Sarıoğlu uzaq məsafədən 4-cü qolu vurub – 4:3. Bununla da “Qalatasaray” növbəti mərhələyə yüksəlib.