Məşhur ifaçı, SSRİ xalq artisti Müslüm Maqomayev oktyabrın 24-dən 25-ə keçən gecə, Moskvadakı evində 67 yaşında ürək tutmasından vəfat edib. Həyat yoldaşının vəziyyətinin pisləşdiyini görən Tamara Sinyavskaya təcili yardım xidmətini çağırsa da, məşhur ifaçının həyatını xilas etmək mümkün olmayıb.

Qeyd edək ki, Müslüm Məhəmməd oğlu Maqomayev adını aldığı məşhur Azərbaycan bəstəkarı Əbdülmüslüm Məhəmməd oğlu Maqomayevin nəvəsidir. M. Maqomayev 17 avqust 1942-ci ildə Bakıda anadan olub. Gənc yaşlarından güclü baritonuyla məşhur olan M. Maqomayev, 1963-cü ildən Azərbaycan Dövlət Opera və Balet Teatrının solisti olub. 1968-ci ildə Azərbaycan Dövlət Konservatoriyasını bitirib. Konservatoriyadan sonra dövlət tərəfindən təhsilini tamamlamaq məqsədi ilə İtaliyaya göndərilib.
M. Maqomayevə geniş şöhrət qazandıran onun opera səhnəsində ifa etdiyi C.Rossininin “Sevilya Bərbəri” operasında Fiqaro partiyası olub. Onun gözəl və yumşaq tembrli gur səsi, ifasının təsirliyi, ruh yüksəkliyi və ifadəliliyi seyirçilər arasında ona əvvəlcə opera səhnəsində, daha sonralar isə estrada da şöhrət qazandırıb. M. Maqomayev, 1969-cu ildə Sopotta və Kannda keçirilən beynəlxalq mahnı müsabiqələrində Azərbaycanı təmsil edərək, ordan 1-ci mükafatla və qızıl valla ayrılıb.

İllər boyunca dinləyicilərin sevgisini qorumağı bacaran Müslüm Maqomayev Azərbaycan SSR əməkdar artisti (1964), «Qırmızı Əmək Bayrağı» Ordeni (1971), Azərbaycan SSR xalq artisti (1971), SSRİ xalq artisti (1973), «Xalqlar Dostluğu» Ordeni (1980), «Şöhrət» Ordeni (1997), «İstiqlal» Ordeni (2002) kimi mükafatlara layiq görülüb.